Berriak

Hurrengo igandean, urriak 25, Bikingo eguna ospatuko da Hondarribian, Federarte festibalaren baitan. Gipuzkoako Surf Federazioak antolatuta, sup inklusiboa egiteko aukera egongo da berriro ere 11:00etatik aurrera. Covid-19aren inguruko segurtasun neurri guztiak zorrotz beteko dira.

Izena eman nahi izanez gero edo informazio gehiagorako, deitu Federaziora: 943462514. Animatu eta parte hartu!



Gaur hasiko da Berlinen (Alemania) paralinpiar igeriketako munduko serieen txapelketa. Igandea bitartean, munduko herrialde ezberdinetako igerilariek parte hartuko dute bertan. Espainiako selekzioan bi gipuzkoarrek parte hartuko dute oraingoan: Iñigo Llopis (Konporta K.E.) eta Nahia Zudaire (Buruntzaldea IKT).

Covid-19a dela eta, txapelketak bertan behera geratu ziren pasa den martxoan. Hauxe izango da nazioarteko lehenengo lehiaketa eta indarrak nola dauden ikusteko aukera ona izango da. Llopisek dagoeneko A minima dauka Tokioko Paralinpiar Jokoetarako. Zorte on bioi!



Goiz ederra atzo Errenteriako Agustina Otaola pilotalekuan. Euskal pilota egokituko LABORAL KUTXA sari nagusiaren finala jokatu da. Pilotalekua zaleez beteta eta kirolariek sekulako maila erakutsi dute. Adimen urritasuna duten kirolarien kategorian, Leire Esnal eta Eneko Sagarmendi izan dira txapeldunak eta gurpil-aulkiko kategorian, Mikel Merino eta Aingeru Senperena izan dira txapeldunak. Zorionak!
Zorionak ere parte-hartzaile guztiei eta hau posible egiten duten babesle eta laguntzaile guztiei. Pozgarria benetan frontoia horrela ikustea, ETB1en zuzenean ikusi ahal izatea... Mikel Izagirre pozik egongo da gaur, izan ere, lan handia egin zuen euskal pilota egokituaren alde. Gaur omenaldi beroa eskaini zaio, merezitakoa! Iazko uztailan hil zen Izagirre baina berak utzitako bideak aurrera darrai!


Joan den irailaren 26an gizarte arloan zein mugimenduan interesatutako hainbat kide elkartu ginen, Errenteriako Dantzagunean, Ari! Sormena eta Mugimendua proiektuaren baitako ikastaroan parte hartzeko. Bertan, Jordi Cortés aritu zen dinamizazio lanetan, eta, besteak beste, mugimendu askea, gorputzen aniztasuna eta sormena uztartzeko parada izan genuen.

Gauzaturiko jarduerek nork bere emozioetan eta partaideen arteko elkarrekintzan sakontzea ahalbidetu zuten, taldean giro atsegina sortzearekin batera; saio praktikoaz gain, koreografo-sortzaileak bere ibilbide profesionalean zehar dantza inklusiboarekin izandako harremanaren nondik norakoak ere azaldu zituen. Finean, master class-ari esker mugimenduaz gozatu, jakintza zein esperientzia berriak barneratu eta elkar ezagutuz aberastu ginen.

Ari! Sormena eta Mugimendua proiektuan Bizipoza Elkartea, Artaziak eta Gipuzkoako Kirol Egokituen Federazioa elkartu dira, Irizar, Orona Fundazioa eta Dantzagunearen laguntzarekin.



Atzo eman zitzaion hasiera Bidanian Euskal Pilota Egokituko LABORAL KUTXA sari nagusiaren kanporaketei.
Pandemia egoerak eskatzen dituen segurtasun neurri gutziak zorrotz beteta, goizean adimen urritasuna duten pilotariek ikuskizun handia eskaini zuten eta bederatzi partida handiren ostean, Iñaki Divasson-Xabier Arizkorreta eta Leire Esnal-Eneko Sagarmendi izan dira hurrengo igandean ETB-ko kamerak zuzenan direla, Errenteriako Agustina Otaola pilotalekuan torneoko finala jokatuko duten bi bikoteak. Urduritasunak gaur erakutsitako maila errepikatzen uzten badie, sekulako partida izan daiteke lehen txapela erabakiko duena.
Arratsaldean, berriz urritasun fisikoa duten pilotariak aritu ziren lehian, euren gurpildun aulkien gainean, sekulako ikuzkizuna eskainiz. Hemen, sei partida jokatu ziren eta Hilario Olano-Beñat Lizaso eta Aingeru Senperena-Mikel Merino izango dira txapelen lehian arituko direnak.
Zortzi finalistak asterte honetan Errenteriako Burdinola Jatetxean egingo den finalen aurkezpenean izango dira, goizeko 11.30etatik aurrera, euren bizipenak kontatzen.


Beste urte batez, Hegalak Zabalik Fundazioarekin batera, martxan jarriko dugu estimulazio goiztiarra uretan programa 0-8 urte bitartean. Urritik aurrera, aukera ezberdinak egongo dira Donostiako hiru toki ezberdinetan: Hegalak kirol zentroan, Intxaurrondo kiroldegian edota Etxadi kiroldegian. Gainera, aurten 8 urte bitarteko haurrek parte har dezakete.

Estimulazio goiztiarra uretan programak hainbat helburu ditu:

-Garapen pskimotorea hobetu.

-Sistema inmunologikoa lagundu.

-Erlaxatzen laguntzen du.

Izena eman nahi izanez gero, edo informazio gehiagorako deitu Federaziora: 943462514 edota idatzi Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.helbidera.

Anima zaitezte!



Beste urte batez euskal pilota egokituko master cup irekia antolatu da eta dagoeneko finalerdiak iristear dira. Datorren larunbatean, urriak 4, finalerdiak egingo dira Bidaniako frontoian. Adimen urritasuna eta urritasun fisikoa duten kirolarientzako aukera paregabea da epe irekia. Izan ere, txapelketa honetan lehia estua egoten da eta partida bikainak ikus daitezke.

Finala, urriaren 11n ospatuko da Errenteriako frontoian eta ETBk zuzenean botako du.

Txapelketaren inguruko informazio gehiago nahi izanez gero: www.epeirekia.eus



Gipuzkoako Surf Federazioak 'Federarte' festibala antolatu du urriaren 3an, Orion. Beste urte batez sup egokitua egiteko aukera izango da, 14:00etan, Arraunetxen. Aukera paregabea izango duzue itsasoaz gozatzeko giro ederrean. Eskerrik asko Gipuzkoako surf federazioari jarduera hau eskaintzeagatik.

Informazio gehiago nahi izanez gero: www.gipuzkoasurf.org



Bigarren urtez, Urbil zentro komertzialak kirol egokituari atea zabaldu dio #UrbilKonpromisoa ekimenaren baitan. Elkarlanari esker, atzotik eta urriaren 4a bitartean, 'KIROLAZ HARATAGO' argazki erakusketa ikusteko aukera egongo da Urbileko bigarren solairuan (zinemaren ondoan). Atzo izan zen aurkezpena eta bertan parte hartu zuten Javier Coloradok (Urbileko gerentea), Alicia Figueroak (GKEFeko zuzendari teknikoa) eta Eneritz Mayorak (GKEFeko kirol teknikaria).

Fernando Zamarbidek ateratako argazkien bidez, kirol egokitua ezagutarazteko helburua du erakusketa honek. Esfortzua, ahalegina, borondatea...askotan argazki batek hitzak baino gehiago adierazten dute, eta kasu honetan, hala da. Gipuzkoako Kirol Egokituen Federaziotik erakusketa ikustera animatzen zaituztegu eta eskerrak eman Urbil taldeari aukera honengatik!

#kirolegokitua #deporteadaptado #kiroladenentzat #deportesinbarreras



Martxoan bertan behera geratu ostean, datorren larunbatean (irailak 26) egingo da Jordi Cortesekin ikastaro trinkoa 'Goputz-politikak, artea eta aniztasuna' izenburupean. Errenteriako Dantzagunean eskainiko da ikastaroa eta tailer teoriko-praktiko hau mugimendu eremuarekin eta eremu sozialarekin erlazionatutako pertsonei zuzendua dago. Covid19 segurtasun neurri guztiak hartuko dira ikastaroa egiteko garaian.

Jordi Cortés dantzaria, koreografoa eta irakaslea da. Ia 30 urteko lan-ibilbidea duelarik, KIAKAHART, ALTA REALITAT Elkartearen eta LIANT LA TROCA dantza integratu/inklusiboko kolektiboaren sortzailea eta zuzendari artistikoa da.

Ikastaro hau Ari! Sormena eta Mugimendua proiektuaren barne kokatzen da, Bizipoza Elkarteak sustatua, Artaziak eta Gipuzkoako Kirol Egokituen Federazioaren lankidatzaren bitartez. Informazio gehiagorako www.artaziak.eus/eu/proiektuak/ari-sormena-eta-mugimendua/

Izena emateko idatzi helbide honetara irailak 23 baino lehen. Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.



© 2020 GKEF-FGDA